成師傅
年齡：40
暱稱：阿輝
專長：水電
入行年資：25年
有一種人就算素未謀面，但總會讓你覺得似曾相識。第一次見成師傅，已有種說不出的親切感，閒談兩句，觀乎其說話聲線、語氣、笑容和神情，都像極一位影星——係電影《點五步》主角林耀聲。
「有冇人話你似林耀聲？」
「都有嘅，你囉。」
「似明星裝修有冇折？」
「咁又冇喎。」
訪問就是以這種輕鬆方式進行，難得阿輝跟筆者又啱嘴形，有理由相信他平時見客都是擺出這張親和笑容，毫無架子。阿輝個子不高，四十出頭仍保留一張入世未深的孩子臉，事實上他入行已超過25年，15歲離開校園便跟隨舅父做學師，專責幫人開鎖。
別小看開鎖這門技藝，要完全理解它的結構才算是真的懂，這方面阿輝是專家：「點為之裝啱一把鎖？一個普通門鎖，今時今日絕大部份師傅都係裝錯！」隨即示範裝鎖，令筆者大開眼界。
做開鎖做了一年半，愛探求新事物的阿輝轉行做屋村的水電舖，主力維修冷氣，由住家的冷氣機，到商場的中央冷氣系統，他都有心得。雖然今日他的專長是水電，但當初竟連「電」是甚麼也一無所知。回想當日在零知識下膽粗粗接觸「電」，到真的「觸電」，阿輝仍猶有餘悸：「我係連點裝個掣面都唔識。記得有次裝一個掣面，跳掣跳咗4次，左搭右搭搭錯線又爆，嗰時唯有從失敗中學習咯！」
這又要多得水電舖的「無良老闆」，讓阿輝在不停觸電的「生死邊緣」中成長，且越電越強。他說：「老闆為咗慳成本，真係無良到乜都夠膽畀我試。油漆以外佢乜都唔識，結果水電、泥水、換鋁窗乜都隊晒畀我做。」阿輝性格隨和，也不太懂得計較，便一切由零開始慢慢摸索，有時會「打電話問功課」，不嫌其煩問師兄、朋友如何穿線、佈線，到後來索性自己睇書鑽研，再學計數背公式考電牌，最終成為一技之長。「其實做乜都一樣，你想精益求精，都係要花時間，都係要不停增值。」阿輝滿自豪的說。
阿輝的「抵得諗」性格，令他長期以中工價錢做師傅工作，但又因他做得夠「雜」，辮數夠多，起樓、起村屋、釘板、紮鐵、落石屎、水電維修全部都識，令他對日後出來做判頭有極大幫助。「可能我身段擺得低啦，不過因為做得夠雜，我所認知嘅工藝，真係比好多裝修師傅多，做判頭去跟每樣嘢亦容易好多。」
阿輝對水電的認知，令他獲得更多有趣的工作機遇。有次他跟隨一team人入梅窩裝修一間百年風水石屋，客人想保留古老味道，但如何做到古舊而不骯髒，就相當考學問，他不時要靠上網搜集資料。而阿輝對電的認識亦大派用場，一入電制房已運籌帷幄，他得意的說：「點樣做一條電線都已經攞你命，好在呢啲都難唔到我。」
今日阿輝接整單工程來做，水電必定由自己把關，他解釋：「水電有太多偷雞位，水電一做衰咗，就返唔到轉頭。」亦因為他做事上心兼親力親為，變相同時間不能接太多工程，生意規模也不能擴大。不過阿輝安於現狀，認為得到客人信任更重要：「其實我哋唔會有生客，生客就係熟客介紹。所以你做衰一個客，就少一個客源。」阿輝的樂天隨和性格，很容易跟客人相處，但這也成為他的缺點，令他常處於不公平局面。「唔想大家有太多拗撬啦，銀碼唔太大嘅話，自己食到咪算囉，當畀個折扣。無謂搞到大家太僵。」
《點五步》有句話，輸贏不重要，最重要是有沒有勇氣踏出半步。筆者想，阿輝踏出的又何止半步？由當日連電都不懂的黃毛小子，到今日變成水電專家，相信人生勝負早已有定案。
