陳師傅│做工程唔可能靠吹水 係有就有冇就冇
「唔好叫師傅，叫阿賢得啦。」
專訪好師傅 | 裝修是要 "Make a Friend"
印象中，極少裝修師傅自我介紹時不叫自己做「師傅」。
這天受訪的陳桂賢師傅，見面時劈頭第一句便說：「唔好叫師傅，叫阿賢得啦。」筆者心裏暗忖，難道找錯了訪問對象？
目測阿賢三十出頭，臉上時刻掛着親和微笑，說話時謙謙有禮，連半句粗口助語詞也沒用上，倒令筆者有點不慣。比起「裝修佬」，阿賢更像個「Sales佬」。
「係呀，我的確Sales出身。」
轉行做裝修 因為幪面超人？
阿賢性格內向，中學畢業後選擇做銷售員鍛鍊膽量及說話技巧，做過批發、團購網，後來又涉獵網絡行銷，前景不錯。那為何會走上「工程」之路？卻與一個人有關，正是他的哥哥。
阿賢自小視哥哥為學習對象，對方的待人處事、生活習慣、性格及嗜好，都深深影響着他，「佢睇幪面超人，我就跟住玩幪面超人！」
原來，他的哥哥有着相同的職業軌跡，同樣是先做銷售，後做工程。有次家中房間需要裝修，兩兄弟夾手夾腳完成後，哥哥貿貿然叫他明天過來幫手，阿賢沒作多想便答應，從此踏上工程之路，不經不覺已10年。
一切由零開始，阿賢都是跟着哥哥邊學邊做：「哥哥係做水為主，可能換吓水喉，或者喺新辦公室做排水系統。」
這樣做了三年，阿賢自覺學有所成，是時候要向外闖闖，便跟哥哥分道揚鑣，轉做住家裝修，哥哥繼續做維修。
做工程唔可能靠吹水 係有就有 冇就冇
由揸筆搵食，突然轉行揸鐵筆、他筆， 除了家人有微言，自己的情緒也有波動，要用兩年時間慢慢調節。
「身邊朋友都係揸筆，冇乜邊個做裝修，硬係覺得自己好似低一級咁。」筆者即場糾正揸筆搵食才是「低一截」，只是俗世對裝修行業存在偏見而已。
「做工程唔可能靠吹水，實打實嘅，係有就有，冇就冇。真係唔得嘅，咪直接答唔得。」
做銷售與裝修的最大不同，是前者可以「一味靠吹」，後者則務必要實事求是。「做工程唔可能靠吹水，實打實嘅，係有就有，冇就冇。真係唔得嘅，咪直接答唔得。」
亦因為阿賢有做sales經驗，見客時會戒掉從前的虛浮，像醫生一樣望聞問切，設實了解顧客需求，再擬定適合方案予對方。
另一方面，阿賢做sales時學會的圓滑與世故，對應付一班老一輩師傅可謂大派用場，有時為正在「炒蝦拆蟹」的師傅排解糾紛，有時師傅頭暈身㷫，阿賢又肯捱義氣補位，令工程更加順暢。
阿賢說：「大家都係為件事，點解嘢嘢都要炒蝦拆蟹呢？我講句唔該，又唔會少咗錢，你又舒服啲，工程又順啲。」難怪阿賢不想被喚作「師傅」，就是為了平起平坐，不分高低。
已經唔係錢問題 係責任問題
平時以禮待人，益處未必明顯，但當遇到危急關頭，就會見功效。
去年2月，正值爆發第三波疫情，阿賢與一位水泥師傅先後中了COVID，碰巧內地的陸運停頓，一批瓷磚要從水路運來港，令他手頭上兩單工程被迫延期。
原本預計4月交貨，連環不幸事件發生後，阿賢當初估計要6月尾才能完工。
「其實每次接到單，就已經唔係錢嘅問題，係責任嘅問題。」
「冇辦法，焗住嗰段時間冧人堆，變咗可能兩個師傅做油漆，四個做泥水。盡谷出嚟，好彩效果都好。」
全賴阿賢平日對師傅必恭必敬，他們非但沒有詐型，還為阿賢賣命趕工，趕及在5月中交貨，加上他又跟客人動之以情，最終難題得以圓滿解決，贏得客人信任，又保存了聲譽，他說：「其實每次接到單，就已經唔係錢嘅問題，係責任嘅問題。」
Make a Deal 還是 Make a Friend？
當日阿賢上sales training，有導師問他「若找到新客，你會先跟他make a deal，還是make a friend？」當時他已懂得答後者，因他重視長線發展。
到今日做裝修，阿賢初心不變，依然是以客為本，「我同客傾唔一定要有交易，做朋友先，可能第日佢搵上門，需要我幫手呢！」
亦因如此，他每次幫客人度尺報價後，都會留下電話，歡迎客人隨時詢問有關裝修問題，從而建立互信關係。
「我同客傾唔一定要有交易，做朋友先，可能第日佢搵上門，需要我幫手呢！」
阿賢當日決心外闖做老闆，他自言其實因自己太懶，「太懶先想做老闆」。現在就算再忙也好，總會找個時間找個藉口，甚麼也不做來放空自己。
至於他月底將出席裝修分享會，笑言因時間不算長，才答應出席，但對於成為「被選中的小朋友」，則感到既驚又喜，阿賢說：「點解會搵着我？嗰刻真係有少少信心問題，覺得自己唔夠，我相信呢個平台有好多師傅更有料。」
然而，回想當日貿貿然轉行，心態都能調整到，這些信心問題自然是微不足道：「就當係一個挑戰啦！」
終於聽到阿賢講粗口。
裝修如何保障自己? 從揀師傅開始
陳師傅（阿賢）親臨解答裝修疑難
好師傅裝修預備班 │ 7月29日│現已接受報名
好師傅裝修預備班活動詳情：
日期： 2023年7月29日（星期六）
時間：上午10 時30分 至 下午1時 30分
地點： 好師傅工作室 - 筲箕灣耀興道3號東匯廣場12樓 (近筲箕灣A2出口)
費用： $100 （每位出席者可獲贈 $100 超市現金券）
贈品：$1000 CoCoMall 現金禮券以及神秘優惠（只限出席者）
嘉賓講者：陳師傅（阿賢）
講題內容：【你問師傅答】
名額只限40名，先到先得。
報名截止日期：2023年7月26日
