劉師傅│你好難改變客人 你只能改變自己
專訪好師傅│未開封的戰衣 沒有「講稿」的對談
看得出劉師傅非常重視這次訪問。
訪問前一天，再三追問筆者訪問內容：「係咪得我講兩個鐘㗎？我擔心冇咁多嘢講。」
訪問前兩小時，傳來錄音短訊：「我到咗單位喇。」
到正式訪問，換上戰衣拍照，相信是從衣櫃底摷出來，還未開封的： 「件衫皺咗少少，唔好介意。」
筆者倒介意他手上的Rolex，差點被它閃盲。師傅這幾年應該撈得不錯。
努力是無止境 30年前只為學門手藝
「細個讀唔成書啦，長輩叫我哋點都要搵門手藝學。」劉師傅最初其實是做地盤，後來因為不夠工開，便跟同學轉行做裝修，一做轉眼便30年了。
裝修這行從來沒有捷徑，劉師傅一樣由學師做起，風火水電、泥水、鬥木、鋁窗，全部都接觸過。當年他還後生，樣樣都肯試，老師傅見他捱得，又願意傾囊相授。
做得靚，自己都有成功感。
眾多範疇之中，劉師傅最愛木工。「因為鬥木由冇到有，慢慢好細緻咁做。做得靚，自己都有成功感。」
早年還會現場做傢俬，在裝修單位放滿架生，甚大陣仗。「開料呀、黐膠板呀、黐邊呀、開門鉸呀，全部親自落手。」劉師傅憶起往事仍一臉自豪。
這也難怪，今時今日傢俬多從內地訂製，工序也縮短很多，木工這門專業手藝，慢慢變得無用武之地。「其實都有啲欷歔，尤其見到後生一輩，可能嵌隻櫃都未必太識。做係做得到，但睇落冇我哋以前咁熟手、咁專業。」
猶幸，劉師傅的木工技巧也有用得着地方，就是度尺寸時必定準確，事前要如何準備，事後要怎樣修口，這些統統難不倒他。
成長就是從失敗中汲取教訓
由「學師仔」捱了幾年，劉師傅自覺學有所成，便膽粗粗接生意來做，結果第一次便「瀨嘢」！當年劉師傅接了一單村屋裝修工程，工藝上當然沒有問題，但如何對客、報價、準備材料、落單上廠等卻從未接觸過，最後要蝕本離場。
「最記得就係鋪個花園要用好多砂，到我哋買砂嗰陣，砂價比報價時加咗一倍！但我哋接得返嚟做，點都要搞掂佢，結果咪焗啃囉！」經一事長一智，這次失敗令劉師傅明白接工程並非想像中容易，當中有很多細節要慢慢虛心學習。「嗰次好傷呀！但做得呢行，你要成長，都要從失敗中汲取教訓。」
你好難改變客人，你只能改變自己。
這些年來，劉師傅學習得最多的，反而是說話技巧。初初接觸客人時，礙於自己不擅辭令，說話兩句起三句止，未能給太多信任予客人。日子久了，釘碰多了，才發覺跟客人溝通多一點，說話禮貌一點，語氣好一點，效果又可能會好一點。
「初初做嗰陣都有唔少爭拗，因為經驗少、溝通少。個客唔開心，自己都唔開心。唔開心係怪自己能力唔夠，咁係咪應該自己檢討一下？點樣做好啲？點樣唔使同個客爭拗？變咗慢慢迫自己進步。」
「你好難改變客人，你只能改變自己。條路就可以行遠啲。」劉師傅深明此理，難怪在這行屹立30年，前路越來越明亮。
裝修像極了愛情
劉師傅最記得兩年前有單工程，起初接觸客人時，感覺到對方對自己不太信任。
「好似拍拖咁樣，要晚晚同佢傾電話，晚晚傾到12點幾！」這樣拍拖拍了個幾月，客人開始信任劉師傅，最重要是他的要求，劉師傅都能有條理地辦妥，去到裝修後期，甚至安心地讓劉師傅全權負責，完工後兩人甚至成為好友，偶爾在社交媒體上噓寒問暖。
「客人對間屋滿意之外，又對你好尊重、好信任，呢樣嘢比起間屋做得靚，我覺得反而仲開心。」
客人對間屋滿意之外，又對你好尊重、好信任，呢樣嘢比起間屋做得靚，我覺得反而仲開心。
劉師傅說話大方有禮，全程對筆者必恭必敬，很難想像他曾是脾氣火爆的躁漢一名，情緒管理更是「零雞蛋」。「總之做出嚟唔係我想要呢，我就揼架餐又盛，又會鬧啲師傅。」
單是傢俬供應商，就經常被他換掉。但隨住年紀大了，又身為兩子之父，說話變得溫柔了，開始發現發脾氣根本解決不了問題，反而凡事以禮待人，總覺得事半功倍。「有啲朋友都講，喂你啲EQ好似越嚟越好喎！」
懂得易地而處 才是真正好師傅
劉師傅處理負面情緒還有一個獨門秘方，就是每天冥想10至30分鐘，讓大腦完全靜止下來，只專注自己的心跳與呼吸。「等你個腦靜一靜呢，之後再做其他嘢，再諗其他嘢，可能諗法都會有啲唔同。」
我用個心出嚟對你，客人係會感受到。
劉師傅給筆者的最大感覺，就是他通過長年累月接觸客人，令他能言善道，亦因他精通多個裝修範疇，令他能有條不紊地解說每項工程細節，甚麼可做甚麼不能做，絕不誇下海口。
劉師傅亦懂得易地而處，處處為客人先着想，再以真誠打動對方。「我覺得真誠係最緊要。我用個心出嚟對你，客人係會感受到。」
劉師傅後來跟筆者說，事前費盡思量如何應付這次訪問。誰料到真正對話時，之前準備的「講稿」都棄掉了。因為他知道，只有真誠對話，才是大家最樂意聽的。
劉師傅│裝修案例
佐敦 | 文昌樓
按此睇片
裝修如何保障自己? 從揀師傅開始
好師傅為你嚴選最可信賴的好師傅。
師傅審查制度為你從源頭把關，每位加盟師傅均要通過29項考核和審查。每年只有7%師傅或設計師，能通過審查成功加盟，因為我們堅持為你嚴選，至可信賴的好師傅。
好師傅為你配對師傅的同時，持續監察師傅的手工質素和背景狀況。除此之外，師傅提供的報價和收費等細節，亦是考慮師傅是否可以信賴的重要一環。
無限次配對機制，讓你揀到啱心水至開工。經審核而成功加盟的裝修師傅／裝修公司／設計公司超過150家，如配對未完全合乎要求，歡迎你配對到啱為止！
「師傅配對及審查制度」只是好師傅「5大保障制度」之一，好師傅的「100%完工保證」，從師傅、價格、 品質、準時及戶主支援等5大保障制度，全方位保障你整個裝修流程，保證你準時入伙。
