用對眼找出問題 再用心去解決
專訪好師傅 | 裝修九成都係「常識」
這一年間，筆者接觸過不少裝修師傅，非正式統計，10個師傅中至少有7個，都是因有親人做裝修，才順理成章或因利乘便入行。當然，有少數之前做sales，亦有做車房轉行的。但這天訪問的蕭師傅，卻是「少數的異數」，就算給你估100次，相信也未必估到他最初的職業。
「我一出嚟做嘢，係做救生員！」
2005年，蕭師傅還是o靚仔一名，在一私人屋苑會所做救生員，認識了任職設計的泳客。對方不知看中他甚麼優點，竟邀請他到其公司工作，自此改變蕭師傅一生。
「最初乜都唔識，都係睇地盤同跟場。不過老細本身做開豪宅，所以我一嚟就睇淺水灣道1xx號，頂樓複式連天台嗰啲。」
你唔了解，又點做得好呢？
阿甘名言：人生就像一盒朱古力，你永遠不知道你將拿到甚麼，但至少要夠膽去拿去試。對裝修零經驗零概念的蕭師傅，就這樣邊問邊做，幾年間即學有所成。
「由師傅進場拆嘢，跟住水電、泥水、油漆、木工樣樣嘢，全部一手一腳跟落去。你做嗰樣嘢，自然想去了解。你唔了解，又點做得好呢？」
那個年頭，一個二十出頭的小子帶領一班老師傅開工，絕對可想像到會有甚麼待遇。蕭師傅性格隨和刻苦，就算被老師傅們訕笑奚落，都視之為「逆境菩薩」，沒半句埋怨之餘，更懂得感恩。
「死o靚仔落地盤實畀人烚，畀人教訓吓你先會識。你俾人玩過，就知點解俾人玩，呢個都係學習過程。」
裝修有九成都是「常識」
蕭師傅認為裝修有九成都是「常識」，只不過常人可能沒機會接觸到。至於「業餘」和「專業」的分別，就取決於有沒有能發現問題的「眼」，和應對問題的「心」。
「我哋跟地盤，第一就係提前規劃，預知成個地盤流程。開工之後，就要用對眼找出問題，再用心去解決。你知道嗰樣嘢有潛在風險，點樣完善解決番佢，呢啲就係專業。」
有啲嘢你冇得規劃，就要預防
身形魁梧的蕭師傅，落場時總能展現出領導者魅力，受師傅信服，也贏得客戶信任。亦因此，他歷年來處理過不少大型商業項目，其中PCCW一個5萬呎辦公室，便由他一手策劃，而施工期跟住家裝修一樣，只得三個月時間。
「3百尺同3萬尺都係有天地牆要做，當然人多咗，事情就複雜咗。但最主要係之前規劃得準確、量得準確，之後做就冇問題。」
然而，有時人算不如天算，無論之前怎規劃部署，總會有意外發生，如早前蕭師傅主理的一項商業工程，就因為一位師傅粗心大意，險釀成嚴重意外。事緣當時要接駁冷氣，但因為師傅與商場員工溝通出現問題，沒有關大水掣，而師傅又強行扭開水龍頭，結果水柱直射入店舖，三分鐘已浸了四吋水！蕭師傅說：
「有時啲人真係好唔小心，所以一定要買好保險。有啲嘢你冇得規劃，就要預防。買保險就係預防，同師傅講話要小心，盡量唔好做危險嘢，都係一種預防。」
蕭師傅給筆者一個印象，就是非常穩陣妥當，難怪他的公司以做泥水和防水最出色，因兩項同屬最具風險。
「防水係好專業，一定要用心去做先做得好。油漆做唔好，可以剷咗佢油過，泥水做唔好，就要重做。」
住客投訴樓上嘈，其實係可以解決
近年，蕭師傅開始有個想法，就是為住家樓做隔音。「成日聽到一啲報道，話住客投訴樓上嘈頂唔順，呢個都係一個困擾，但其實係可以解決。」事實上，他亦幫過不少band房及studio做隔音，效果亦十分理想，故他提出這想法後，都有不少業主查詢這項工程。然而，隔音工程一來要花費，二來樓底縮了兩吋，要說服業主也不容易。
訪問其間，蕭師傅的太太一直在場，筆者留意到她不時用崇拜目光凝視着蕭師傅，令人間接感受到他的務實與可靠。想了解蕭師傅更多，不妨出席月中舉行的分享會，看看筆者可有言過其實。
裝修如何保障自己? 從揀師傅開始
好師傅為你嚴選最可信賴的好師傅。
師傅審查制度為你從源頭把關，每位加盟師傅均要通過29項考核和審查。每年只有7%師傅或設計師，能通過審查成功加盟，因為我們堅持為你嚴選，至可信賴的好師傅。
好師傅為你配對師傅的同時，持續監察師傅的手工質素和背景狀況。除此之外，師傅提供的報價和收費等細節，亦是考慮師傅是否可以信賴的重要一環。
無限次配對機制，讓你揀到啱心水至開工。經審核而成功加盟的裝修師傅／裝修公司／設計公司超過150家，如配對未完全合乎要求，歡迎你配對到啱為止！
「師傅配對及審查制度」只是好師傅「5大保障制度」之一，好師傅的「100%完工保證」，從師傅、價格、 品質、準時及戶主支援等5大保障制度，全方位保障你整個裝修流程，保證你準時入伙。
