師傅要有強迫症？
筆者身邊有不少強迫症朋友，程度有輕有重，也見識過他們的強迫行為。但有強迫症的裝修師傅，平生還是首次遇到。
陳師傅外表嚴肅冷酷，不苟言笑，長相有幾分似「腦細」林日曦，哪會想到他跟對方一樣，都患有強迫症！陳師傅未必事事追求完美，但只要觸碰到某些禁忌，諸如油漆不均勻，批灰不夠直，掣面歪了少少，登時神經發作，渾身不自在。
「或者我睇到有少少問題，就一定要執。過唔到就係過唔到。」陳師傅冷冷的說。
好一句「過唔到就過唔到」，回想16年前陳師傅初初入行，跟隨做裝修判頭的爸爸做打雜，頭一個月返工已叫苦連天，辛苦到差點「過唔到」。身為家中幼子，非但沒有得到爸爸的特別厚待，反而凡事要親力親為，甚麼大型架撐、物料，都由年紀最輕的陳師傅來搬。
「嗰陣做舊區多，好多都冇lift，唐四樓都照搬，手就起晒泡。當刻諗住唔做啦，真係頂唔順。」
做着做着，不經不覺捱過一個月，又好像沒想像中辛苦，心想反正都是一份工，便繼續做下去，一做便做了16年。
入行的初心未變
其實在此次前，陳師傅也做過餐飲業，亦返過寫字樓，最終還是選了做裝修，全因這行夠無拘無束，又不用對着四幅牆，最重要是隨時可以食煙：
「唔使好似做嗰啲寫字樓工咁，食支煙都煩。」
已為人父的他，今日雖然煙已戒，但當日抱着學習心態入行的初心未變，依舊是邊做邊學，裝修用到的小型工程牌、水電牌都考獲了，最近還報讀了AutoCAD短期課程，不停充實自己。
訂單接踵而來
不知跟強迫症有沒有關係，陳師傅的領悟力比一般人強，做雜工的幾年間，他從不同範疇的師傅裏偷師，短時間精通油漆、水電，25歲便夠膽接整單工程來做。
當時有位同門師兄接了一張單，原本打算找陳師傅一起做，後來覺得價錢太低打退堂鼓，其時陳師傅望着報價單，眉頭一皺，但本着吸取經驗為前題便放手一博。
「價錢係好賤，鹹到基本上做完得份人工。但我心諗，有個機會不如試下啦，因為機會唔係成日有。」
最終工程平手離場，但有了第一次經驗，自此訂單便接踵而來。
總之我睇到唔得就唔得
訪問期間，筆者一直好奇有強迫症的裝修師傅究竟會怎樣？答案就是，幾乎可以保證沒有甩漏，因為陳師傅埋尾一定跟到足，任何微細瑕疵也逃不過其法眼。
「啲手工呀，水電油漆嗰啲我捉得好嚴，所以好多嘢我都自己落手落腳執，總之我睇到唔得就唔得㗎啦。」
賣手工之餘 都要賣埋服務
人一生總會遇到幾個畸客，陳師傅竟然從未遇過，他估計是因為回覆ＷhatsApp夠快，令客人放心。
「客人唔會搵唔到我哋，基本上唔係揸車或做緊其他嘢，一個鐘頭內可以即刻覆。」
試過無數個夜晚，他為了量度一件傢私的尺寸，漏夜駕車由觀塘「劈」入屯門，就是希望立即回覆到客人。
「其實可能上去都係５至20分鐘內嘅事，但唔整就成晚都瞓唔着。」
對於爸爸有時半夜「失蹤」，有時凌晨4點篤電話，孩子早已見怪不怪。陳師傅說：
「始終客人出錢，咁你賣手工之餘，都要賣埋服務。其他嘢都唔會怠慢，客人係感受到。」
一味堅持 往往令自己吃虧
陳師傅的強迫行為，客人當然叫好，但也成為他的缺點。他自問有時真的太過執着，有些裝修細節，客人基本上不會清楚，但他就是一味堅持，往往令自己吃虧。
舉例說，有些傢俬裝完後會打一條白色填縫膠，一般師傅唧完膠便起貨。但陳師傅每次都會黐一條膠紙，再在膠紙上油油，確保填縫膠不會變黃發黑。而這些工序極花時間，一般客人根本不會知曉，陳師傅說：
「客人係要結果，唔會關心中間個過程係點。你做完之後，啲客又睇唔到，又唔會讚你。」
班底依家有一兩個師傅 都有強迫症呀
以陳師傅的性格，照理應會不停挑剔他的師傅班底，那麼誰又會肯跟他合作呢？原來筆者憂慮太多了。「自己班底OK嘅，因為依家有一兩個師傅都有強迫症呀！」陳師傅仍是這張冷冷的臉。
裝修如何保障自己? 從揀師傅開始
好師傅為你嚴選最可信賴的好師傅。
師傅審查制度為你從源頭把關，每位加盟師傅均要通過29項考核和審查。每年只有7%師傅或設計師，能通過審查成功加盟，因為我們堅持為你嚴選，至可信賴的好師傅。
好師傅為你配對師傅的同時，持續監察師傅的手工質素和背景狀況。除此之外，師傅提供的報價和收費等細節，亦是考慮師傅是否可以信賴的重要一環。
無限次配對機制，讓你揀到啱心水至開工。經審核而成功加盟的裝修師傅／裝修公司／設計公司超過150家，如配對未完全合乎要求，歡迎你配對到啱為止！
「師傅配對及審查制度」只是好師傅「5大保障制度」之一，好師傅的「100%完工保證」，從師傅、價格、 品質、準時及戶主支援等5大保障制度，全方位保障你整個裝修流程，保證你準時入伙。
